UMDLALI wakuleli obhethayo u-Anneke Bosch ekhishwa u-Isabella Gaze weNew Zealand ngesikhathi la mazwe ebhekene kowamanqamu weNdebe yoMhlaba yeT20, eDubai International Cricket Stadium, ngeSonto Isithombe: AFP
LIPHINDE lakhubeka ekugcineni iqembu lakuleli elabesifazane lekhilikithi, linqotshwa yiNew Zealand ngama-run angu-32 kowamanqamu e-ICC Women's T20 World Cup.
Womabili lawa maqembu abebheke ukunqoba lo mqhudelwano okokuqala ngqa.
Bekungokwesibili iNew Zealand idlala kowamanqamu, kowango-2010 yanqotshwa yi-Australia ngama-run amathathu.
Iqembu lakuleli langena kowamanqamu okokuqala nyakenye, nalo laguqiswa yi-Australia ngama-run angu-18.
AmaProteas awine ithosi akhetha ukushwiba kuqala kulo mdlalo obuseDubai International Stadium, e-United Arab Emirates.
INew Zealand ihlanganise ama-run angu-158 kuma-over ayo angu-20,sekuphume abadlali abahlanu.
Kubhoke kakhulu u-Amelia Kerr, oshaye ama-run angu-43 emabholeni angu-38, noBrooke Halliday, oshaye angu-38 emabholeni angu-28.
Kubashwibi bakuleli kuphinde kwagqama uNonkululeko Mlaba othathe amawikhethi amabili, waqeda umqhudelwano esenangu-12. Uphinde wahlanganisa amawikhethi angu-50 emidlalweni yeT20 yamazwe ngamazwe.
AmaProteas abedinga ukushaya ama-run angu-159 ukuze anqobe umdlalo. Iqembu lakuleli liqale kahle kubhetha ukaputeni uLaura Wolvaardt noTazmin Brits kodwa bagcina bephume ngokulandelana.
UBrits ubeseshaye ama-run angu-17 emabholeni angu-18, uWolvaardt enangu-33 emabholeni angu-27.
Izinto azibange zisalihambela kahle elakuleli lilahlekelwa abanye abadlali abamqoka, u-Anneke Bosch, Marizanne Kapp noSune Luus bengakasinciphisi isibalo sama-run abedingeka.
Aqhubekile nokuwa ubuthaphuthaphu amawikhethi amaProteas, aqeda ama-over awo angu-20 enama-run angu-126, sekuphume abadlali abayisishiyagalolunye.
INdebe yoMhlaba yeT2o yabesifazane elandelayo izobanjelwa e-England ngo-2026.
AmaProteas asezobheka ukwenza kangcono kwelandelayo ye-One Day International ezodlalelwa e-India ngonyaka ozayo.
Related Topics: