UPHUMELELE Ngcobo (okwesokunxele) ozolwa noThabiso Mthembu empini yebhande le-KZN Welterweight Isithombe: SITHUNYELWE
ITHEMBA lakhe lonke uselibeke esibhakeleni uPhumelele "Scishamlilo" Ngcobo (27) owaphuthwa ithuba lokudlalela iqembu lombhoxo amaHollywoodbets Sharks nokuba umshayeli wamabhanoyi.
Le nsizwa yasePinetown, eThekwini, namuhla izobhekana noThabiso Mthembu empini yebhande elingaphethwe muntu le-KZN Welterweight. Le mpi iyingxenye yomqhudelwano ohlelwa yiTap Tap Boxing Academy KwaDukuza Town Hall, eStanger.
Umqhudelwano uxhaswe wuMnyango wezemiDlalo, ubuCiko namaSiko. Amasango azovulwa ngo-12 emini.
Impi yosuku izoba phakathi kwezintokazi uWendy Gcadu waseLindelani noNoxolo "Bumblebee" Mkhasibe waseGeorgedale, eHammarsdale, ezizobanga ibhande elingaphethwe muntu le-SA Female Middleweight
UNgcobo kuzoba ngokwesithathu engena eringini.
Kweyokuqala ngoNovemba wanyakenye, unqobe ngamaphuzu kuMatt Dematos. Kweyesibili ngoSepthemba ushaye ngomcacamezelo womlalisaphansi u-Omedowa Abdallahaziz wase-Uganda empini yomhlaba.
Leli bhokisa eliqeqeshwa uSizwe "Bhubesi" Mthembu noZwilenkosi Magudulela eThekwini Boxing Gym, litshele Isolezwe ukuthi lisafunda belidlala ibhola lombhoxo. Lithe ukuzinikela kwalo kwagcina kuholela ekutheni lingene kwi-The Sharks Academy ngo-2019.
"Ngase ngizitshelile ukuthi ngizongena noma yikanjani eqenjini elikhulu lamaSharks. Bengidlala kahle kakhulu, nabaqeqeshi bengincoma. Ngakhishwa khona yisimo semali. Kwakukhokhwa u-R47 000 ngonyaka. Kwagcina kusihlula ekhaya ukukhokha le mali,"kubeka uNgcobo osheba ezamankomane nomsebenzi wokuba isicishamlilo.
Uqhube wathi:"Ngathi uma ngiphuma khona ngaba nenhlanhla yokuthola umfundaze wokuyofundela ukushayela amabhanoyi eDurban Aviation Academy. Bese ngisiqalile isibhakela. Ngokuhamba kwesikhathi umfundaze wami waphelelwa yimali nesikole saba nezinkinga. Nakhona ngashiya. Wonke amathemba ami okuphumelela empilweni sengiwabeke esibhakeleni. Ngiyazi ukuthi ngelinye ilanga ngizophatha ibhande lomhlaba."
Mayelana nempi yanamuhla, uNgcobo uthe ahambe kahle amalungiselelo. Uveze ukuthi akakaze asibone isitha sakhe silwa.
"UMthembu ufana nencwadi evaliwe, angikaze ngimbone elwa. Nakuba kunjalo anginavalo. Njengoba ngisho ukuthi ngizibona ngelinye ilanga ngiwumpetha womhlaba ngeke ngivume ukuthi ame endleleni yami. Ibhande le-KZN Welterweight liyisiqalo,"kuqhuba uNgcobo.
UMthembu unqobe kanye, wahlulwa kanye, walwa ngokulingana kanye.
Related Topics: