Kugcine kumlungele uKhonkhobe ekhonya kwiTwo Oceans
UNQOTSHWE wumgijimi waseNorth-West umjaho waminyaka yonke iTotalsports Two Oceans Marathon yebanga lika-56km obugijinywa eKapa, ngoMgqibelo ekuseni.
U-Onalenna Khonkhobe (27) ongaphansi kweNedbank Running Club, ushaye intambo ngesikhathi esingu-3:09:30.
Ulandelwe ezithendeni uLloyd Bosman naye ongaphansi kweNedbank Running Club ngesikhathi esingu: 3:09:58, isithathu kwaba umpetha wanyakenye, uGivemore Mudzinganyama we-Entsika Athletics Athletics ngesikhathi esingu-3:11:13.
UMudzinganyama waseZimbabwe wanqoba umjaho ka-2023 ngesikhathi esingu:3:09:42.
Kwabesifazane kuphinde kwakhonya uGerda Steyn wePhantana Athletics Club. Le ntandokazi yomgijimi wakuleli ayigcinanga ngokunqoba umjaho wayo wesihlanu kulandelana kodwa, iqophe irekhodi elisha u-3:26:54, ephula abeliqophe nyakenye lika-3:29:06.
Isibili kwaba wu-Irvette Van Zyl weHollywoodbets AC ngesikhathi esingu: 3:29:30, isithathu sathathwa wuLoveness Madziva waseZimbabwe ongaphansi naye ongaphansi kweHollywoodbets ngo:3:38:00.
UJenet Mbhele KwaZulu-Natal, umele ngempumelelo abagijimi besifazane baseKZN ethatha indawo yesine ngesikhathi esingu-3:41:08
UKhonkhobe waseKlerskdorp, eNorth-West, unqoba lo mjaho nje, nyakenye akalibonanga elidlalayo ephuma endaweni ka-38, ekubeni ngo-2022 wayethathe indawo yesithupha kulo mjaho.
Ukunqoba kukaKhonkhobe kusho ukuqhubeka nokukhonya kwabagijimi baseNorth-West emijahweni yamabanga amade eMzansi abangaphansi kweNedbank Running Club kaNick Bester.
UTete Dijana waseNorth-West, naye ogijimela iNedbank, usekhonye iminyaka emibli ilandelana edla umhlanganiso kwiComrades Marathon.
Abagijimi abebebhekiwe, okubalwa kubo uDan Matshailwe ophume isibili nyakenye, uSiboniso Sikhakhane noStephen Mokoka obewugijima okokuqala lo mjaho ebangeni lika-56km, abalibonanga elidlalayo njengoba bengangenanga nasohlwini lwabayishumi abaphume phambili.
Irekhodi labesilisa lango-1988 lika-3:03:44 likamufi uThompson Magawana lisamile.