ABASUBATHI abahlonishwayo eMzansi sebewulungele umjaho iHollywoodbets 10km Joburg ozoba seGoli ngoMgqibelo. Kusuka kwesokunxele nguReghen Magwai, Elroy Gelant, Piet Wiersma, Thabang Mosiako noStephen Mokoka ISITHOMBE: Sithembiso Mkhize
UStephen Mokoka, ongomunye wabasubathi okubhekwe ukuthi badle umhlanganiso emlenzeni wokuqala weHollywoodbets Joburg 10km, uveze ukuthi umzimba wakhe usuwulungele ngokuphelele lo mjaho.
Umjaho uzosukela ngaphandle kwenkundla iWanderers Stadium ngoMgqibelo ngo-6 ekusei, uphele eJames and Ethel Grey Park.
Ngesikhathi usungulwa lo mjaho ngo-2021, kwavezwa ukuthi uzogijinyelwa eThekwini ekomkhulu lale nkampani yokugembula. Ngenxa yesasasa nokukhula kwawo, iHollywoodbets AC igcine ithatha isinqumo sokwenza omunye umlenze ozobe uqalwa ukugijinywa eGoli. NgoLwesihlanu bekunesithangami sabezindaba eSandton lapho okwethulwe khona izinhlelo zawo. Kuvele ukuthi kulindeleke abasubathi abawu-6000. NjengowaseThekwini, abasubathi abazoshaya intambo bazoklonyeliswa ngo-R37 500. Abazophuma endaweni yesibili bazothola u-R30 000, kulandele abazongena kweyesithathu ngo-R27 500. Kukhokhwa kuze kuyofinyelela kwabazolala kweyeshumi. Isiyonke imali ebekelwe imiklomelo ingu-R357 500.
UMokoka, obemele elakuleli kuma-Olympic Games eParis, eFrance, utshele abezindaba ukuthi usephumule ngokwanele, wethemba ukuthi uzokwenza kahle kulo mjaho ohlelwa ikilabhu yakhe, iHollywoodbets AC.
"Angikaze ngigijime selokhu ngibuye kuma-Olympic. Vele angilona lolu hlobo olugijima noma yimuphi umjaho. Ngisuke ngenzela ukuthi uma sengigijima ngenze kahle. Ngithemba ukuthi nakusasa kuzoba njalo,"kubeka uMokoka.
Abanye abagijimi besilisa abebekhona kulesi sithangami ngu-Elroy Gelant weBoxer AC, umpetha weComrades Marathonu Piet Wiersma noThabang Mosiako beNedbank Running Club noReghen Magwai weHollywoodbets AC.
Kwabesifazane bekukhona uBlandina Makatisi noCacisile Sosibo beMaxed Elite, Neheng Khatala weHollywoodbets noKarabo Mailula weTuks Sport. Umlenze waseThekwini ugijinywe ngasekupheleni kukaSepthemba. Kwabesilisa unqotshwe uTebello Ramakongoana waseLesotho ogijimela iXcel Running Club (28.06). Kuvele ukuthi naye uzogijima kowaseGoli. UGelant ulale isibili (28.07), isithathu kwaba uKamohelo Mafolo wayo iMaxed Elite (28.09). Kwabesifazane kukhonye uNeheng (32.25), isibili sathathwa uCacisile (32.48), isithathu kwaba uBlandina (33.06).
Umengameli weHollywoodbets AC, uMorgan Shandu, uzwakalise ukukujabulela ukusungulwa komlenze waseGauteng.
"Ngesikhathi sisungula lo mjaho sasazi ukuthi uzogcina ujabulisa bonke abantu bakuleli. Yisitobhi sokuqala lesi saseGoli, sisaqhubekela phambili. Asingabazi ukuthi nalo mjaho uzohamba kahle,“kubeka uShandu.
Related Topics: