USIHLALO webhodi yeComrades Marathon Association, uMqondisi Ngcobo (kwesokunxele) noPhumelela Dlomo wenkampani iGems engabaxhasi bomjaho iComrades Marathon Isithombe:COMRADES
USIHLALO omusha weComrades Marathon Association (CMA), uMqondisi Ngcobo, uveze isizathu sokukhuza ibuya ebhodini entsha evotelwe emasontweni adlule.
UNgcobo wesule isigubhukane esikhundleni sokuba ngusihlalo webhodi ye-CMA ehlela umjaho iComrades Marathon ngo-Agasti namanye amalungu amathathu okunguLeslie Burnard, Kerwin Basson noPhumlani Ntuli.
Nakuba singadalulwanga isizathu sokwesula kukaNgcobo, kodwa kuvele izinsolo zokukhungathwa kwayo yizinkinga zomdonsiswano wangaphakathi nokwehluleka ukuphatha ngendlela. Kuqubuke nezinsolo zokucwasa ngokobuhlanga ezilandelwe wuphenyo, lagcina lihlakaziwe ibhodi.
Ngemuva kokhetho lobuholi obusha be-CMA obeluseMgungundlovu ngesonto eledlule, uNgcobo uphinde wakhethwa ebhodini entsha, wabuyiselwa kwesikasihlalo.
“Ekwesuleni kwami ngo-Agasti ngasibeka isizathu sami okwakungesokuxinwa wumsebenzi. Nokho, amanye amalungu ebhodi ye-CMA abe esenginxenxa ethi angibuye. Anginxenxa impela nje kangangokuthi nami ngaze ngasibona isidingo sokuthi ngibuye. Nebala ngabuya ngenxa yothando enginalo nge-Comrades Marathon.
Umdlalo wokugijima usenhliziyweni yami, kanti nokusebenzela umphakathi kusenhliziyweni yami. Kuyangithokozisa ukuphinda ngethenjwe ngokuthi ngiqokelwe kulesi sikhundla sokuhola le nhlangano. Kuyinkomba yokuthi abantu basabethemba ubuholi bami ekuholeni le nhlangano,” kusho uNgcobo, engxoxweni ekhethekile neSolezwe.
Lesi sikhulu sicacise ukuthi njengoba sesibuyele esikhundleni sokuba ngusihlalo we-CMA, kusho ukuthi sesizophatha ihlandla elilodwa.
“Ngokomthethosisekelo we-CMA njengoba bese ngiphathe isikhundla sokuba ngusihlalo iminyaka emithathu, lokho kusho ukuthi sengizophatha ihlandla elilodwa bese ngishenxa. Okubaluleke kakhulu njengamanje kithina esiqokwe kuleli bhodi elisha wukuqinisekisa ukubuya kozinzo nokusebenza ngokubambisana ekuseni phambili lo mjaho wethu omkhulukazi nohlonishwayo.”
Amanye amalungu amasha ebhodi entsha kubalwa uMark Leathers oyiphini likaNgcobo, Breand Marole, Carel Nolte, Rory Steyn, Alan David Gray, Willie Mtolo, James Moloi, noNontuthuko Mashimane.
Inselelo ebhekene nebhodi entsha wukuletha uzinzo ikakhulukazi njengoba eseqalile amalungiselelo omjaho wangonyaka ozayo weComrades ozogijinywa ngoJuni 8 usuka eMgungundlovu uya eThekwini.
Related Topics: