UMoseamedi ufilizise ikusasa leChiefs kwiDStv

KUPHINDE kwayibhedela iKaizer Chiefs iguqiswa yiMaritzburg United ngo 2-0 emdlalweni weDStv Premiership, obuseFNB Stadium, eGoli, izolo ntambama.

Womabili amagoli enqobe ngawo iMaritzburg, abhakuziswe nguJudas Moseamedi ngesiwombe sesibili. Elokuqala ulingqomfele phakathi ngekhanda ngomzuzu ka-65 ngemuva kwebhola ebeligotshwe uMalebogo Modise, kwathi elesibili walishaya ngomzuzu ka-79 ebhuquzisa uRamahlwe Mphahlele ngaphambi kokubhakuzisa inethi, ehlula uDaniel Akpeyi.

UMoseamedi usephenduke isilwane esisabekayo ezitobheni zeChiefs njengoba esekwenze injwayelo ukubhakuzisa inethi njalo uma ezakhe zibhekene naleli qembu laseNaturena, njengoba enza nangesizini edlule.

Womabili la maqembu abewadinga ngokufanayo amaphuzu kulo mdlalo, ikakhulukazi iTeam of Choice elwa nokusuka endaweni ka-15 ku-log, kanti Amakhosi nawo abesendaweni engeyinhle ka-13 ku-log ngaphambi komdlalo wayizolo.

Amakhosi asanqobe umdlalo owodwa kuphela emidlalweni eyisishiyagalolunye, agcine edlala ngokulingana neBloemfontein Celtic ngo 1-1 koweligi ngoDisemba 19, kanti iTeam of Chiefs ibithole iwini yayo yokuqala ngeledlule iguqisa iCeltic ngo 2-1.

U-Ernst Middendorp, osengumqeqeshi weMaritzburg, ubebhekene okokuqala neChiefs emkhombe indlela ngemuva kokwehluleka ukuyinqobela isicoco seligi yePremiership, ngesizini edlule.

Kanti ngakolunye uhlangothi lokhu kusho ukuqhubeka kwezinkinga kumqeqeshi weZimpofana, uGavin Hunt, njengoba leli qembu lisalokhu libhinjelwa yizinto emidlalweni yeligi selokhu kuqale le sizini.

Ukunqoba kweTeam of Choice lo mdlalo kuyisuse endaweni ka-15 kwayibeka endaweni ka-12 ku-log yePremiership, kanti ukwehlulwa kweZimpofana ebezisendaweni ka-13 kuzishovele endaweni ka-14 ku-log, okuyindawo embi kakhulu.

Amakhosi ashaywa yiTeam of Choice nje, ngoLwesithathu ayotholana phezulu naMaZulu FC eJohnsson Kings Park Stadium, eThekwini ngo-3 ntambama. Kubukeka kuya ngokuya kuba mnyama ebusweni benkawu kuleli qembu laseNaturena, ngoba selivele lilahle amaphuzu angu-17 futhi sekuyacaca ukuthi ngeke lisakwazi ukusinqoba isicoco seligi. Lokho kusho ukuqhubeka kwesomiso sezindebe kuleli qembu ebeligubha iminyaka engu-51 ngoLwesine.