UMckenzie utakule iSafa ngo-R5 million

UNgqongqoshe wezeMidlalo, ubuCiko namaSiko, uGayton McKenzie, usetakule iSouth African Football Association ngesamba sika-R5 million ukuze izokhokhela abadlali beBafana Bafana nabeBanyana Banyana imiholo ebakweleta yona.

Emasontweni adlule, kuputshuke ukuthi ubuhlwempu beSafa sebuholele ekutheni yehluleke ukukhokhela abadlali beqembu lesizwe imiholo namabhonasi okufanele bayithole uma besekhempini. ISafa ikweleta nabadlali beBanyana Banyana. Lolu daba lugcine lufakwa kwinyunyana yabadlali iSouth African Football Players Union (Safpu).

NgoLwesihlanu, umnyango kaMcKenzie uthumele isitatimende umemezela ukuthi usunikeze iSafa imali ehambisana nemibandela ukuze izokhokhela abadlali. Kuvele ukuthi uMcKenzie uyena obhalele iSafa wezwakalisa ukufuna ukwelula isandla. Le mali izodonswa kwezonikwa iSafa kwisabelo mali sangonyaka ozayo. Ngaphezu kwalokho, ubuholi beSafa kufanele buchaze ukuthi kungani le nhlangano iswele imali, iqhamuke neqhinga lokushintsha lesi simo.

“Asikwazi ukuvumela abadlali bangene kuncibijane bengakhokheliwe, ikakhulukazi njengoba benze izwe laziqhenya.Iqembu labesilisa lisanda kuzibekisela indawo kwii-Africa Cup of Nations (Afcon) futhi sidinga ligxile emalungiselweni ale nselelo, nokuqinisekisa ukuthi siyangena eNdebeni yoMhlaba ka-2026 e-USA, Mexico naseCanada. IBanyana Banyana ihambe phambili, iwina i-Africa Women’s Championship ngo-2022, yangena kwiFifa World Cup nyakenye,”kusho uMcKenzie esitatimendeni.

Ezintweni eziholele ezinkingeni zemali kwiSafa, wukuqgqoza kwabaxhasi abebelokhu bephuma belandelana eminyakeni edlule.