OwaMaZulu ubona ubungozi kwi-AM kowabakhaya

UBUKEKA uzoba ngowamagqubu umdlalo wabakhaya baKwaZulu-Natal weBetway Premiership phakathi kwaMaZulu FC neRoyal AM eKing Zwelithini Stadium, eMlaza, namuhla ngo-7.30 ebusuku.

Ngesizini edlule AmaZulu yiwona awinile emzuliswaneni wesibili, exebula i-AM ngo 3-0 ekubeni kowomzuliswano wokuqala zibambane ngo 0-0. Emdlalweni womkhumulajezi ngedlule kukhonye AmaZulu ekhipha i-AM ngo 1-0 kowe-Last 32 yeNedbank Cup.

Nokho, kule sizini womabili la maqembu awaqalanga kahle njengoba ebalwa nasezansi kwi-log yePremiership.

Usuthu lusendaweni ka-14, i-AM isendaweni ka-12. Lokhu kwenza womabili la maqembu alambele amaphuzu ukuze asuke esishozini sezembe.

Umqeqeshi waMaZulu, u-Arthur Zwane, ukuqonda kahle ukubaluleka kwalo mdlalo njengoba ezakhe zibuya esibhaxwini sika 1-0 ezisithole kwi-TS Galaxy ngeledlule.

“Imidlalo yabakhaya kunzima ukuyiqagela. Sidlala neqembu elidlala ngobuhlakani. Ngicabanga ukuthi beza kulo mdlalo wethu nabo benokuzethemba ngemuva kokudlala ngokulingana neKaizer Chiefs emdlalweni abagcine ukuwudlala ababuye kuwona belandela emuva ngo 2-0, bagcina bethole iphuzu ekuhambeni. Ngakho bazoba yingozi. Kodwa sikulindele ukubhekana nabo, futhi sizolisebenzisa ithuba lokudlalela kwethu ekhaya,” kusho uZwane.

“Okubaluleke kakhulu wukuthi sivuke sizithathe. Akukhona ukuthi asidlali kahle, sidinga nje ukulungisa le nto yokuqedela kwethu amathuba okushaya amagoli phambi kwamapali, okuyinto esiyisebenzayo njengamanje ukuyilungisa njengoba nasemdlalweni wethu esigcine ukuwudlala (neGalaxy) sibe naleyo nkinga ekubeni besidlala kahle. Ngakho kulo mdlalo esiya kuwona sizosebenzisa iqhinga elihlukile, ngoba inhloso wukuthi siqhubeke nomgqigqo wethu abesesewuqalile ngaphambi kokushaywa yi-Galaxy.”

Ngakolunye uhlangothi, umqeqeshi we-AM, uJohn Maduka uthe: ““Silindele umdlalo onzima kuMaZulu, futhi nabadlali bami bayakwazi ukubaluleka kwalo mdlalo ikakhulukazi njengoba umdlalo wabakhaya uhlale ungelula neze.

Nokho lo ngumdlalo esizimisele ngokubuya namaphuzu kuwo, ngakho siwuthatha njengempi enzima esiyoyilwa kodwa esizimisele ngokubuya sinqobile kuyona.”