UMQEQESHI weBafana Bafana, uHugo Broos, nephini lakhe, uHelman Mkhalele, bazowazi namuhla amazwe okufanele bawahlelele ngaphambi komqhudelwano i-Africa Cup of Nations ozoba sekupheleni konyaka eMorocco Isithombe: BACKPAGEPIX
KUZOCACA namuhla ngamazwe azogadulisana neBafana Bafana emqhudelwaneni i-Africa Cup of Nations (Afcon) ozoba sekupheleni konyaka eMorocco.
IBafana eqede endaweni yesithathu kwi-Afcon ebise-Ivory Coast nyakenye, ibalwa namazwe angu-24 azibekisele indawo emqhudelwaneni ozoba seMorocco ngoDisemba 21 kuya kuJanuwari 18, 2026. Namuhla ngo-7 ebusuku, kuzoqhathwa amazwe azobanga le ndebe emcimbini ozoba seRabat. Kulo mcimbi, iNingizimu Afrika izomelwa ngumengameli weSouth African Football Association (Safa), uDanny Jordan, iphini lomqeqeshi weBafana, uHelman Mkhalele, nemenenja yeqembu, uVincent Tseka. Kulolu hambo, amaqembu azothola ithuba lokuhlola izinkundla zokudlala, ezokuziqeqesha namahhotela.
Amazwe azodlala kwi-Afcon azokleliswa ngokwezindawo zawo ezilinganisweni zeFifa ngaphambi kokutonyulwa ngokwamaqoqo. Ayisithupha aphezulu, azoba kuPot 1. Lokhu kuzokwenza ukuthi la mazwe angangeni eqoqweni elilodwa. IBafana, ezibekisele indawo kwi-Afcon emuva kokuqeda eqhulwini kuGroup K, izongena ku-Pot 2. Amazwe azohlukaniswa amaqoqo ayisithupha. Amabili azoqeda ehlezi phezulu eqoqweni azohlanganiswa namane angcono aqede endaweni yesithathu ukukhipha azogadulisana kwi-Last 16.
UJordan ucashunwe kwi-website yeSafa ethi iBafana izobhekwa njengelinye lamaqembu aqinile uma sekutonyulwa.
“Siwubheke ngabomvu umcimbi wukutonyulwa kwamaqembu ngoMsombuluko. Iqembu lethu lithathwa njengelikwangagayelwa mphako ezwenikazi futhi wonke amehlo azobe ebheke lo mcimbi,” kusho yena.
“Ukukhula nokuthuthuka kwaleli qembu eminyakeni embalwa edlule kuyamangaza. Emuva kokwehluleka ukuzibekisela indawo, umqeqeshi, uHugo Broos, wakhe iBafana Bafana yabalwa namaqembu aphezulu e-Afrika.”
Amazwe ahlukaniswe kanje ngaphambi kokutonyulwa.
Pot 1: Morocco, Senegal, Egypt, Algeria, Nigeria, Ivory Coast
Pot 2: Cameroon, Mali, Tunisia, South Africa, DR Congo, Burkina Faso
Pot 3: Gabon, Angola, Zambia, Uganda, Equatorial Guinea, Benin Mozambique, Comoros
Pot 4: Mozambique, Comoros, Tanzania, Sudan, Zimbabwe, Botswana
Related Topics: