UMvoti esicongweni kuqhuzuka iNjampela kwi-KZN Motsepe

UMVOTI FC ushubise umbango wesicoco kuStream A weSafa KwaZulu-Natal ABC Motsepe League ngokuguqisa i-Asande FC ngo 1-0 ngoMgqibelo e-Edgewood Campus Ground, ePinetown.

UMvoti oqeqeshwa ngu-Ayanda Dlamini, usuqhwakele ngamaphuzu angu-22 emidlalweni engu-11. INjampela ebisihlale isikhathi eside esicongweni se-log yehlele endaweni yesibili ngangu-21 emidlalweni elinganayo. Endaweni yesithathu kuhleli iMidlands Wanderers ngangu-20. IMidlands iguqise iDurban Pioneers ngo 2-0 ngawo uMgqibelo, eKing Zwelithini Stadium, eMlaza.

INjampela yehle esicongweni ngemuva kokubambana ngo 0-0 neHellenic ngoLwesihlanu.

Ukuminyana kotshumo ngale ndlela kuStream A, kuyinkomba yokuthi lusekude ukhalo olusazohanjwa yila maqembu amathathu asembangweni wesicoco.

Lokhu kwenza umdlalo weMidlands noMvoti FC ubhekwe ngabomvu, kwazise ungase ucacise okuningi ngokuqhubeka kombango kuStream A. Lo mdlalo uzoba ngoMgqibelo ngo-12 emini eHarry Gwala Stadium, eMgungundlovu.

Kwenzeka lokhu nje, kuStream B kubukeka sekucacile ngeqembu elizodla isicoco liye kodlala amaPlay-Offs esifundazwe njengoba uMkhambathi FC ulokhu uqhubeke njalo nokuvula igebe esicongweni se-log kulandela ukushaya iDrakensberg FC ngo 1-0.

Leli qembu laseMgungundlovu eliqeqeshwa nguJulius Dube, selivule igebe lamaphuzu angu-12 phakathi kwalo noMsinga United osendaweni yesibili. Umsinga nunebule iNewcastle All Stars ngo 4-1. UMkhambathi useqhulwini ngamaphuzu angu-33, uMsinga usendaweni yesibili ngangu-21.