IMINYAKAZO kaGaston Sirino weKaizer Chiefs igcine ingathelanga zithelo kwazise ugcine ekhishwe ngekhadi elibomvu ngesikhathi behlulwa yiSuperSport United emdlalweni weBetway Premiership eFNB Stadium, eNasrec, ebusuku Isithombe: BACKPAGEPIX
Kaizer Chiefs (1) 1
SuperSport United (2) 4
KUFANELE ukuba balale kuqaqamba izinhliziyo abalandeli beKaizer Chiefs kulandela ukuphoxwa kwayo yiSuperSport United emdlalweni weBetway Premiership, e-FNB Stadium, eNasrec.
USamir Nurkovic noChristinan Saile abalethwa yiChiefs ebholeni laseMzansi, bashayele iSuperSport amagoli amabili kwamane enqobe ngawo.
IChiefs iphoxwa yiqembu ebeliqala ukuwina kulo nyaka nje, iqede umdlalo ingasaphelele kulandela ukukhishwa ngekhadi elibomvu kukaGaston Sirino esiwombeni sesibili.
Ayizange ifike kwemihlanu imizuzu umdlalo uqalile, walidumisa enethini uNurkovic.
UGlody Lilepo ushayele iChiefs elokulinganisa ngaphambi kokuthi uSaile ohlukane nayo ngenyanga edlule abuyisele izivakashi ebuhleni ngelakhe.
UGampani Lungu noSiphesihle Ndlovu bashaya awokushayela isipikili sokugcina.
La magoli angena elandelana nje, ngokomdlalo iChiefs iyona ebikhombisa izimpawu zokubonana kangcono kodwa bekuthi uma iSuperSport ilithola ihlasele ngesivinini okuyindlela ethole ngayo amagoli ayo.
Mhlawumbe umkhuhlane ohlasele ithimba labaqeqeshi beChiefs ube nomthelela ekubandeni kweChiefs ngemizuzu yokuqala yomdlalo kwazise abadlali bayo abazange bazelule enkundleni njengenjwayelo ngaphambi kokuqala komdlalo.
Eyomkhuhlane iqinisekiswe umqeqeshi weChiefs, uNasreddine Nabi, ngesikhathi ekhuluma nabakwaSuperSport ngaphambi kokuqala komdlalo.
Zinyomfeke umdlalo uqala izinhlelo zakhe ngegoli likaNurkovic alishaye ngomzuzu wesithathu maqede, wangalijabulela ngoba ehlonipha iChiefs.
Ngomzuzu ka-30, uLilepo ulinganisele iChiefs ngegoli alingqofele enethini elakhelwa uPule Mmodi obese eyeke ithuba elihle ngokwakhe.
Kudlule imizuzu emibili omunye wabadlali abalethwa yiChiefs eMzansi uSaile, wabuyisela iSuperSport ebuhleni ngegoli alakhelwe uNurkovic.
Kwale noma uNabi esekhiphe uMmodi wafaka uMduduzi Shabalala kodwa kwangaba namehluko otheni.
Okufanele ukuba kumjabulisile uNabi ukuthi nakwesesibili isiwombe iChiefs ibisaqhubeka nokuzama ukuthola igoli lokulinganisa.
Esikhundleni sokuthi ilinganise kube uLungu oshaya elesithathu leSuperSport ngomzuzu ka-63 ngaphambi kokuthi uNdlovu avalele elesine neliqede amandla eChiefs.