UNASTY C ngomunye wabaculi abazobonakala benandisa emcimbini walo nyaka, iDrakensberg Extravaganza &Heritage Experience Music Festival, ezoba seBergville ekuqaleni kukaDisemba ISITHOMBE: SIGCINIWE
KULINDELEKE ukuthi bashaye ibuya oDJ baphesheya kwezilwandle, uRocco Rodamaal noLars Behrenroth, abashiya inkundla ishisa ngonyaka odlule emcimbini waminyaka yonke, iDrakensberg Extravaganza & Heritage Experience Music Festival.
Lo mcimbi, owenzelwa ngaphansi kwezintaba zasoKhahlamba, eBergville, kulo nyaka uzobanjwa ngoDisemba 2.
Ekhuluma ngawo umhleli wawo, uSipho Ndaba, uthe bahlele ukuthi basebenze nabaculi bakuleli abanye asebezakhele igama phesheya kwezilwandle.
“Sonke siyazi ukuthi uNasty C akaseyena nje owethu kuphela kodwa naphesheya kwezilwandle usehlala ekhona ngenxa yamagalelo akhe. Sibone kungcono ukuthi simfake ohlwini lwabazonandisa kulo mcimbi futhi siyethemba uzojabulisa abaningi. Kanjalo nezinsizwa zaseGermany ezenza into yamehlo ngonyaka odlule, sikhethe ukuthi sizibuyise,” kusho uSipho.
Uthe uyazi ukuthi baningi abaculi asebebamemezele ukuthi bazoba yingxenye yalo mcimbi kodwa bangakuqinisekisa ukuthi abakapheleli.
“Sisesezingxoxweni nomphakathi waseBergville ukuzwa ukuthi yibaphi abaculi abafuna ukubabona kulo mcimbi. Singakwenza konke ukuwuhlela kodwa ngabantu bendawo okumele bajabule ngakho sikhethe ukuthi siye kubo ukuze sibezwe bafuna obani. Kukhona amaciko esisaxoxa nawo ukuya phambili ukuze abe khona ngalolu suku,” kuchaza yena.
Uthe nasezinkundleni zokuxhumana balivulile ithuba lokuthi abantu basho abaculi ababafunayo.
Phakathi kwababaqinisekisile ukuthi bazoba khona kubalwa uBig Zulu, Tyler ICU, Lwah Ndlunkulu, Da Muziqal Chef Eemoh, Goldmax, Sha Sha, Nathi Mankayi, Babes Wodumo, Dladla Mshunqisi, Blaq Diamond, Xowla,Professor, Sbo Da Poet, Kwesta noLindough.
USipho uthe lo mcimbi uyingxenye yengu-11 abayenzayo ukuthuthukisa umphakathi wasemakhaya.
Uveze ukuthi amathikithi aseyatholakala eTicketpro ngoR200 noR600 iVIP.