Imisebenzi kaConnie imlandela engasekho
AYAQHUBEKA nokubonakala amagalelo engwazi yomlingisi engasekho, uConnie Chiume, oshonele esibhedlela ngo-Agasti 6 ngemuva kokungeniswa khona egula.
UConnie, ohlonishwe ngenqwaba yemiklomelo ngokulingisa emidlweni ehlukene, ungomunye wabalingisi befilimu entsha ezokhonjiswa kwi-Netflix.
Le filimu, i-Meet the Khumalo's, ibophele nabanye abalingisi abadumile phakathi kwabo okubalwa noKhanyi Mbau, Bonga Dlamini, owagqama enguMkhonto kuZalo, Ayanda Borotho noJesse Suntele.
Kuthiwa le filimu izoqala ukuboniswa "maduze".
Akuyona kuphela into entsha elindeleke kwi-Netflix maduze njengoba nomdlalo, iKing's of Joburg, uzokhuza ibuya nesizini yesithathu.
Lo mdlalo, okhiqizwa yi-Ferguson Films, ubophele abalingisi okukhona kubo uZolisa Xaluva, Connie Ferguson no-Abdul Khoza.
Omunye obuyayo ngowakhonjiswa ngo-2023, i-Unseen. Kuwona kulingisa phambili uGail Mabalane onguZenzi Mwale. UZenzi ungumsizi wasendlini owenza inqwaba yamacala okubulala ngesikhathi ethungatha umyeni wakhe odukile.
NgoMashi 21 kuzoqala umdlalo omusha okuthiwa yiGo! obophele uKatlego Danke, Vusi Kunene, Dawn Thandeka King, Wiseman Mncube, Shalate Sekhabi, Ntobeko Sishi nabanye.
Ukhuluma ngomgijimi osemncane, othola elinye ithuba empilweni ngokunikezwa umfundaze kodwa okungaziwa noma uzokwazi yini ukujaha amaphupho akhe noma uzokheqwa ngamanga akhe.
