Baqubule imvunge uKelly no-Arthur

ISILOMO somculi uKelly Khumalo nengwazi ye-kwaito u-Arthur Mafokate basuse ukukhuluma ezinkundleni zokuxhumana ngezithombe zabo bendawonye.

U-Arthur ufake isithombe kwi-Instagram ebambe uKelly ngoSuku lweziThandani. Besingenambhalo ngaphandle kwezinhliziyo ezibomvu ezimbili.

NoKelly ufake esakhe bebukana emehleweni no-Arthur.

“Isazozalwa le tsotsi ezosihlukanisa!” kubhala uKelly.

Kusuke igidigidi ezinkundleni zokuxhumana abantu beqagela ukuthi bayathandana yini.

Imizamo yokubathola igcine ingaphumelelanga.

Ucingo luka-Arthur belukhala lungabanjwa. Izolo uphinde wafaka esinye isithombe bebambene ngezandla noKelly sebengasafakile izingubo ezifana nezakulezi ezinye izithombe abebezinamekile.

Isolezwe lithole ukuthi bebeqopha i-video yengoma engakaphumi.

Laba bobabili abaqali ukusebenza ndawonye njengoba ngo-2015 bakhipha ingoma ethi Nguwe Lo.

Ngaleso sikhathi kwakunezinkulumo zokuthi uKelly uzovala isikhala sikaChommie okuyinto u-Arthur ayichitha.

Abantu bebephawula ngezindlela ezingafani ngalezi zithombe.

“Uzofa wena sika lekhekhe,” kuphawula uMseleku kwi-Instagram.

U-Btshp uthe abamtshele ukuthi baqopha i-music video.

“Ngizwelana kakhulu nomndeni wakwaMafokate ngokulahlekelwa yindodana yawo u-Arthur. Ngiyazi ukuthi ubesho ukuthini kini. Ngizonigcina emicabangweni nasemithandazweni,” ubhale kanje uMams_john.

U-Theeetraveller uthe babukeka bejabule.

UBrndavaloyi uthe uKelly ungowesifazane oqine kunabo bonke abaziyo.

“Niyafanelana,” kusho uYangamapisa.