Kuyajabulisa ukubona abamnyama behosha imfe kwiDA
MHLELI: Ngicela ukusika elijikayo ngibongele omunye wabaholi engimthanda ngendlela exaka ukwenza, oseqoke ukushiya phansi iDA. Sengisho uMbali Ntuli. Ngimfisela okuhle kodwa empilweni nakwezepolitiki.
Njengoba ubesesebenze iminyaka engaphezu kuka 15 kwiDA lokhu kukhomba ukuthi usemnkantshubomvu kwezepolitiki, ngakho-ke isinqumo sokusula kwiDA usithathe emva kokusicabangisisa. Mina nje kuyangijabulisa kakhulu ukubona abaholi abamnyana behosha imfe kwiDA.
Lokhu kukhomba ngokusobala ukuthi kukhulu ukunganami kubaholi abamnyama kwiDA. Osekusele wukuthi bonke labaholi abaphuma beqhasha kwiDA bagibele phezu kwendlu njengoMazola, bamemeze basitshele siyindlu emnyama ukuthi baxoshwa yini kuleli qembu labelungu.
Phela izwe liyakudinga ukwazi ukuthi kwenzekani kuleli qembu labelungu njengoba liyiqembu elikhulu, eliphikisayo ePhalamende likazwelonke. Kusobala ukuthi abaholi abamnyama kuleli qembu bahlezi lubhojozi kwiDA. Yingakho kumele bahlabe umkhosi babemeze batshele izwe ukuthi baxoshwa yini lapha.
Cishe yisiphukuphuku kuphela esingaboni ukuthi abaholi abamnyama bayasentshenziswa, bayaxhashazwa kuleli qembu, uma sebezifezile izinhloso zabanikazi beqembu (abamhlophe) bashiswa izinqa ngenguzunga yelahle, ngenhloso yokuba baphume baphele kwiDA.
Bathi bephumile benjalo bahamba bemumethe uvolo, bangakhulumi ngesihogo abasuka kuso. Ngimfisela okuhle kodwa okaMphemba. Sengathi angakhumbula abanye ayelahleke nabo kwiDA abalande, okungenani basebenzele indlu emnyama njengoba iDA nayo isebenzela abamhlophe.
Obhalile
Sibahle Ngobese